अथ सिंहादिवर्गः ।

सिंहो मृगेन्द्रः पञ्चास्यो हर्यक्षः केसरी हरिः ।
कण्ठीरवो मृगारिपुर्मृगदृष्टिर्मृगाशनः ॥२.५.१॥

पुण्डरीकः पञ्चनखचित्रकायमृगद्विषः ।
शार्दूलद्वीपिनौ व्याघ्रे तरक्षुस्तु मृगादनः ॥२.५.२॥

वराहः सूकरो घृष्टिः कोलः पोत्री किरिः किटिः ।
दंष्ट्री घोणी स्तब्धरोमा क्रोडो भूदार इत्यपि ॥२.५.३॥

कपिप्लवङ्गप्लवगशाखामृगवलीमुखाः ।
मर्कटो वानरः कीशो वनौका अथ भल्लुके ॥२.५.४॥

ऋक्षाच्छभल्लभल्लूका गण्डके खड्गखड्गिनौ ।
लुलायो महिषो वाहद्विषत्कासरसैरिभाः ॥२.५.५॥

स्त्रियां शिवा भूरिमायगोमायुमृगधूर्तकाः ।
शृगालवञ्चकक्रोष्टुफेरुफेरवजम्बुकाः ॥२.५.६॥

ओतुर्बिडालो मार्जारो वृषदंशक आखुभुक् ।
त्रयो गौधारगौधेरगौधेया गोधिकात्मजे ॥२.५.७॥

श्वावित्तु शल्यस्तल्लोम्नि शलली शललं शलम् ।
वातप्रमीर्वातमृगः कोकस्त्वीहामृगो वृकः ॥२.५.८॥

मृगे कुरङ्गवातायुहरिणाजिनयोनयः ।
ऐणेयमेण्याश्चर्माद्यमेणस्यैणमुभे त्रिषु ॥२.५.९॥

कदली कन्दली चीनश्चमूरुप्रियकावपि ।
समूरुश्चेति हरिणा अमी अजिनयोनयः ॥२.५.१०॥

कृष्णसाररुरुन्यङ्कुरङ्कुशम्बररौहिषाः ।
गोकर्णपृषतैणर्श्यरोहिताश्चमरो मृगाः ॥२.५.११॥

गन्धर्वः शरभो रामः सृमरो गवयः शशः ।
इत्यादयो मृगेन्द्राद्या गवाद्याः पशुजातयः ॥२.५.१२॥

अधोगन्ता तु खनको वृकः पुंध्वज उन्दुरः ।
उन्दुरुर्मूषकोऽप्याखुर्गिरिका बालमूषिका ॥२.५.१३॥

सरटः कृकलासः स्यान्मुसली गृहगोधिका ।
लूता स्त्री तन्तुवायोर्णनाभमर्कटकाः समाः ॥२.५.१४॥

नीलङ्गुस्तु कृमिः कर्णजलौकाः शतपद्युभे ।
वृश्चिकः शूककीटः स्यादलिद्रुणौ तु वृश्चिके ॥२.५.१५॥

पारावतः कलरवः कपोतोऽथ शशादनः ।
पत्री श्येन उलूकस्तु वायसारातिपेचकौ ॥२.५.१६॥

दिवान्धः कौशिको घूको दिवाभीतो निशाटनः ।
व्याघ्राटः स्याद्भरद्वाजः खञ्जरीटस्तु खञ्जनः ॥२.५.१७॥

लोहपृष्ठस्तु कङ्कः स्यादथ चाषः किकीदिविः ।
कलिङ्गभृङ्गधूम्याटा अथ स्याच्छतपत्रकः ॥२.५.१८॥

दार्वाघाटोऽथ सारङ्गस्तोककश्चातकः समाः ।
कृकवाकुस्ताम्रचूडः कुक्कुटश्चरणायुधः ॥२.५.१९॥

चटकः कलविङ्कः स्यात्तस्य स्त्री चटका तयोः ।
पुमपत्ये चाटकैरः स्त्र्यपत्ये चटकैव सा ॥२.५.२०॥

कर्करेटुः करेटुः स्यात्कृकणक्रकरौ समौ ।
वनप्रियः परभृतः कोकिलः पिक इत्यपि ॥२.५.२१॥

काके तु करटारिष्टबलिपुष्टसकृत्प्रजाः ।
ध्वाङ्क्षात्मघोषपरभृद्बलिभुग्वायसा अपि ॥२.५.२२॥

स एव च चिरञ्जीवी चैकदृष्टिश्च मौकुलिः ।
द्रोणकाकस्तु काकोलो दात्यूहः कालकण्ठकः ॥२.५.२३॥

आतायिचिल्लौ दाक्षाय्यगृध्रौ कीरशुकौ समौ ।
क्रुङ्क्रौञ्चोऽथ बकः कह्वः पुष्कराह्वस्तु सारसः ॥२.५.२४॥

कोकश्चक्रश्चक्रवाको रथाङ्गाह्वयनामकः ।
कादम्बः कलहंसः स्यादुत्क्रोशकुररौ समौ ॥२.५.२५॥

हंसास्तु श्वेतगरुतश्चक्राङ्गा मानसौकसः ।
राजहंसास्तु ते चञ्चुचरणैर्लोहितैः सिताः ॥२.५.२६॥

मलिनैर्मल्लिकाक्षास्ते धार्तराष्ट्राः सितेतरैः ।
शरारिराटिराडिश्च बलाका बिसकण्ठिका ॥२.५.२७॥

हंसस्य योषिद्वरटा सारसस्य तु लक्ष्मणा ।
जतुकाजिनपत्रा स्यात्परोष्णी तैलपायिका ॥२.५.२८॥

वर्वणा मक्षिका नीला सरघा मधुमक्षिका ।
पतङ्गिका पुत्तिका स्याद्दंशस्तु वनमक्षिका ॥२.५.२९॥

दंशी तज्जातिरल्पा स्याद्गन्धोली वरटा द्वयोः ।
भृङ्गारी झीरुका चीरी झिल्लिका च समा इमाः ॥२.५.३०॥

समौ पतङ्गशलभौ खद्योतो ज्योतिरिङ्गणः ।
मधुव्रतो मधुकरो मधुलिण्मधुपालिनः ॥२.५.३१॥

द्विरेफपुष्पलिड्भृङ्गषट्पदभ्रमरालयः ।
मयूरो बर्हिणो बर्ही नीलकण्ठो भुजङ्गभुक् ॥२.५.३२॥

शिखावलः शिखी केकी मेघनादानुलास्यपि ।
केका वाणी मयूरस्य समौ चन्द्रकमेचकौ ॥२.५.३३॥

शिखा चूडा शिखण्डस्तु पिच्छबर्हे नपुंसके ।
खगे विहङ्गविहगविहङ्गमविहायसः ॥२.५.३४॥

शकुन्तिपक्षिशकुनिशकुन्तशकुनद्विजाः ।
पतत्रिपत्रिपतगपतत्पत्ररथाण्डजाः ॥२.५.३५॥

नगौकोवाजिविकिरविविष्किरपतत्रयः ।
नीडोद्भवाः गरुत्मन्तः पित्सन्तो नभसङ्गमाः ॥२.५.३६॥

तेषां विशेषा हारीतो मद्गुः कारण्डवः प्लवः ।
तित्तिरिः कुक्कुभो लावो जीवञ्जीवश्च कोरकः ॥२.५.३७॥

कोयष्टिकष्टिट्टिभको वर्तको वर्तिकादयः ।
गरुत्पक्षच्छदाः पत्रं पतत्रं च तनूरुहम् ॥२.५.३८॥

स्त्री पक्षतिः पक्षमूलं चञ्चुस्त्रोटिरुभे स्त्रियौ ।
प्रडीनोड्डीनसंडीनान्येताः खगगतिक्रियाः ॥२.५.३९॥

पेशी कोशो द्विहीनेऽण्डं कुलायो नीडमस्त्रियाम् ।
पोतः पाकोऽर्भको डिम्भः पृथुकः शावकः शिशुः ॥२.५.४०॥

स्त्रीपुंसौ मिथुनं द्वन्द्वं युग्मं तु युगुलं युगम् ।
समूहे निवहव्यूहसंदोहविसरव्रजाः ॥२.५.४१॥

स्तोमौघनिकरव्रातवारसङ्घातसञ्चयाः ।
समुदायः समुदयः समवायश्चयो गणः ॥२.५.४२॥

स्त्रियां तु संहतिर्वृन्दं निकुरम्बं कदम्बकम् ।
वृन्दभेदाः समैर्वर्गः सङ्घसार्थौ तु जन्तुभिः ॥२.५.४३॥

सजातीयैः कुलं यूथं तिरश्चां पुन्नपुंसकम् ।
पशूनां समजोऽन्येषां समाजोऽथ सधर्मिणाम् ॥२.५.४४॥

स्यान्निकायः पुञ्जराशी तूत्करः कूटमस्त्रियाम् ।
कापोतशौकमायूरतैत्तिरादीनि तद्गणे ॥२.५.४५॥

गृहासक्ताः पक्षिमृगाश्छेकास्ते गृह्यकाश्च ते ।

इति सिंहादिवर्गः ।