• Audio Alignment • Rāmāyaṇa • 4.061: Sampaati s legend [contd.] •

4.061: Sampaati s legend [contd.]

Loop (OFF)

ततस्तद्दारुणं कर्म दुष्करं साहसात्कृतम् ।
आचचक्षे मुनेः सर्वं सूर्यानुगमनं तदा ॥ १ ॥
भगवन् व्रणयुक्तत्वाल्लज्जया व्यकुलोन्द्रियः ।
परिश्रान्तो न शक्नोमि वचनं प्रतिभाषितुम् ॥ २ ॥
अहं चैव जटायुश्च सङ्घर्षाद्दर्पमोहितौ ।
आकाशं पतितौ वीरौ जिज्ञासन्तौ पराक्रमम् ॥ ३ ॥
कैलासशिखरे बध्वा मुनीनामग्रतः पणम् ।
रविः स्यादनुयातव्यो यावदस्तं महागिरिम् ॥ ४ ॥
अथावां युगपत्प्राप्तावपश्याव महीतले ।
रथचक्रप्रमाणानि नगराणि पृथक् पृथक् ॥ ५ ॥
क्वचिद्वादित्रघोषांश्च ब्रह्मघोषांश्च शुश्रुवः ।
गायन्तीश्चाङ्गना बह्वीः पश्यावो रक्तवाससः ॥ ६ ॥
तूर्णमुत्पत्य चाकाशमादित्यपथमाश्रितौ ।
आवामालोकयावस्तद्वनं शाद्वलसन्निभम् ॥ ७ ॥
उपलैरिव सञ्छन्ना दृश्यते भूः शिलोञ्चयैः ।
आपगाभिश्च संवीता सूत्रैरिव वसुन्धरा ॥ ८ ॥
हिमवांश्चैव विन्ध्याश्च मेरुश्च सुमहान्नगः ।
भूतले सम्प्रकाशन्ते नागा इव जलाशये ॥ ९ ॥
तीव्रः स्वेदश्च खेदश्च भयं चासीत्तदाऽऽवयोः ।
समाविशति मोहश्च तमो मूर्च्छा च दारुणा ॥ १० ॥
न दिग्विज्ञायते याम्या नाग्नेयी न च वारुणी ।
युगान्ते नियतो लोको हतो दग्ध इवाग्निना ॥ ११ ॥
यत्नेन महता ह्यस्मिन् पुनः सन्धाय चक्षुषि ।
यत्नेन महता भूयो रविः समवलोकितः ॥ १२ ॥
तुल्यः पृथ्वीप्रमाणेन भास्करः प्रतिभाति नौ ।
जटायुर्मामनापृच्छ्य निपपात महीं ततः ॥ १३ ॥
तं दृष्ट्वा तूर्णमाकाशादात्मानं मुक्तवानहम् ।
पक्षाभ्यां च मया गुप्तो जटायुर्न प्रदह्यते ॥ १४ ॥
प्रमादात्तत्र निर्दग्धः पतन् वायुपथादहम् ।
आशङ्के तं निपतितं जनस्थाने जटायुषम् ॥ १५ ॥
अहं तु पतितो विन्ध्ये दग्धपक्षो जडीकृतः ।
राज्येन हीनो भ्रात्रा च पक्षाभ्यां विक्रमेण च ॥ १६ ॥
सर्वथा मर्तुमेवेच्छन् पतिष्ये शिखराद्गिरेः ॥ १७ ॥